Բերանի տհաճ հոտ

Բերանի տհաճ հոտի պատճառները բազմաթիվ են: Դրան կարող են նպաստել տարբեր օրգանների, բերանի լորձաթաղանթի, լնդերի (գինգիվիտ, պարօդոնտիտ), կարիեսով և փտախտով ախտահարված ատամները, բայց մեծ մասամբ, հիգիենայի կանոնները չպահպանելու հետևանքով բերանի խոռոչում սննդի մնացորդների կուտակումը: Պակաս դեր չունեն անորակ պլոմբները, ատամնաշապիկները, կամրջաձև և շարժական պրոթեզները (որոնց շուրջը կուտակվում են սննդի մնացորդներ), իմաստության ատամների դժվարությամբ դուրս գալու դեպքում` լնդերի բորբոքումները: Այն հաճախ կարող է առաջանալ պարօդոնտիտներից, երբ ատամները ցավելու պատճառով հիվանդները խուսափում են կոշտ սննդամթերքից. ակտիվ ծամելուց, որը հանգեցնում է բերանի խոռոչի մեխանիկական ոչ բավարար մաքրման: Դրա հետևանքով միջատամնային տարածություններում, լեզվի և լնդերի վրա նստվածք Է կուտակվում, որը և դառնում է տհաճ հոտի պատճառ: Խիստ նպաստում են թարախային ախտահարումով ատամնալնդային գրպանիկները, լնդերի պարօդոնտիտային արյունահոսությունները, մածուցիկ, թանձր թուքը, թքարտադրության նվազումը (որի հետևանքով տեղի է ունենում սննդի մնացորդների կուտակում), լնդերի բորբոքումների պատճառով` հյուսվածքային սպիտակուցների քայքայումը: 

Բերանի տհաճ հոտը կարող է լինել ըմպանի, շնչափողի, բրոնխների, թոքերի (աբսցես), կերակրափողի, ստամոքսի, քթի լորձաթաղանթի (օզենա), հավելյալ խոռոչների, նշիկների խրոնիկական բորբոքումների, ըմպանաբորբի, նշիկաբորբի, ձայնալարերի բորբոքումների, գանգրենայի, տուբերկուլոզի, լյարդի ցիռոզի, փորկապության, դիաբետի, երկաթի անբավարարության պատճառով առաջացած սակավարյունության հետևանք: Առաջին նախապայմանը պատճառը վերացնելու նպատակով կազմակերպված բուժումն է, ինչպես նաև բերանի խոռոչի հիգենայի կանոնների պահպանումը, օրը երկու անգամ մածուկով և խոզանակով ատամները լվանալը, ուտելուց հետո միջատամնային տարածություններում կուտակված սննդի մնացորդները ողողումների կամ ատամնամաքրիչների միջոցով հեռացնելը: Անհրաժեշտ է նաև դեզադորացնող հատկությամբ օժտված միջոցների օգտագործումը: Դրանց թվին են պատկանում ջրածին պերօքսիդի 3 տոկոսանոց (ողողելու համար. 1 բաժակ ջրին` մեկ ճաշի գդալ), մանգանաթթվային կալիումի (1 բաժակ ջրին` 30-40 կաթիլ), քլորամինի 0,5 տոկոսանոց  (1 բաժակ ջրին` 1 ճաշի գդալ), ցիտրալի սպիրտային 1 տոկոսանոց (1 բաժակին` 30 կաթիլ) լուծույթները: Կարելի է օգտագործել նաև ատամների էլիքսիր, մեկ բաժակ ջրին` 

10-15 կաթիլ: 

Ատամների և լնդերի հիվանդությունները, որոնք բերանի տհաճ հոտի հիմնական պատճառն են, կանխելու համար անհրաժեշտ է պարբերաբար դիմել բժիշկ-ստոմատոլոգի, որը ժամանակին կհայտնաբերի դրանք և կբուժի: 

Հարցեր, պատասխաններ, մեկնաբանություններ